LA UNION – Kinumpiska dagiti kameng ti Philippine National Police iti 34 troso a karaman kadagiti klase ti kayo a nainget nga ipawpawil ti gobyerno a pukanen babaen ti naisayangkat a check point idiay kawatiwatan ti national highway idiay Barangay Antonino, ili ti Balaoan, La Union.

Iti report a nakalap ti Bombo Radyo La Union manipud idiay Balaoan Municipal Police Station, maipagarup a ginandat nga ipuslit ken ilako ti suspek a ni Elledoro Andayes, 47, residente iti ili ti Tagudin, Ilocos Sur dagiti kayo ti narra ken molave nga inluganna iti
manmanehuenna a truck.

Dagiti nakompiskar a kayo ket adda ita iti kustudiya ti pulisya ken maisagsaganan ti maiyanatop a kaso laban iti nasao a suspek.

Naammuan a dagiti kayo ti narra ken molave ket karaman kadagiti premium hardwood species ken mabalin laeng daytoy a pukanen no adda iti pammalubos ti mismo a secretary iti Depertment of Environment and Natural Resources.