LA UNION – Arestado dagiti tallo a lallaki gapu ti panangikot kadagiti baril ken panagtutpkda iti maysa a bus driver idiay probinsya a La Union.

Nabigbig dagiti suspek nga isuda Sherwin Tabalba, 36; Dave Orassion, 35; ken Marby Esko, 23, agpapada a residente ti Quezon City.

Naammuan ti Bombo Radyo La Union manipud idiay Rosario Municipal Police Station, nagkiddaw iti arayat kadagiti pulis a mangisaysayangkat ti check point iti maysa a bus driver a ni Armando Aquino, 34, residente ti ili a Bugallon, Pangasinan, kalpasan a tinutukan daytoy dagiti suspek nga addaan kadagiti ikot a paltog idiay kawatiwatan iti national highway idiay ili ti Rosario, La Union.

Gapu iti daytoy, dagus met a naalarma ken nangisayangkat ti check points dagiti kameng iti pulisya kadagiti kabangibang nga ili agingga a natiliw dagiti tallo a nakalugan iti maysa a pick-up idiay ili ti Sto. Tomas idiay probinsya.

Narekobre manipud kadagiti suspek ti maysa a .45 caliber ken maysa a .40 caliber pistol karaman dagiti bala dagitoy.

Maipagarup a gapu iti apa ti trapiko iti nangiduron tapno tutukan kadagiti paltog dagiti suspek ti nadakamat a bus driver.