LAOAG CITY – Nagtalinaed pay laeng iti banko ti minilyun a kuwarta nga inabak ti maysa kadagiti winner ti mega lotto iti daytoy a lawas a taga ciudad ti Laoag gapu ta awan pay ti napanunot na a pangipanan wenno pangigastusan.

Ti winner nga saanen a nainaganan gapu iti pakaseknan ti seguridadna ket agtawen ti 36, addaan ti asawa, dua ti annakna wenno singin dagiti annak na, tubo ti ciudad ti Laoag ngem naikamang iti ciudad ti Batac ken maysa a merchandiser wenno agilaklako kadagiti nagduduma a grocery items.

Segun ti ama na a dati a pulis a dagiti numero a nangabakan ti anakna iti mega lotto ket nabayagen nga taytayaan na gapu ta umaboten ti tawen ngem mangab-abak laeng no dadduma iti babassit a kantidad.

Dagiti numero ket kombinasyun ti birthday ti asawa, dagiti annak na a singin ken ti birthday ti nasao a winner.

Sakbay ti panangabak ti winner ket naibagbaga na kadagiti nakaikamangan na iti ciudad ti Batac nga sukatan na ti baro ti pagtaengan da.

Inbatad ti ama ti winner a ti kaudian a 20 a pisos nga intaya na ket dinawat na iti asawana nga daytoy ket igatang koma ti asawa na iti kanen dagiti annak na.

Innayun pay ti ama a no dadduma ket saan nga agmermeryenda ti anakna gapu itaytayana iti lotto.

Maysa kadagiti singin nga anak ti winner ket adda sakit na.

Ti nasao a nangabak ket nakibingay iti 42 a milyun a pisos a premyo iti mega lotto no sadino a ti kinabingay na ket taga Sta Cruz, Laguna.