VIGAN CITY- Dismayado ti umab-abot 500- a nagpartisipar iti 24K Pataray 2012 ( fun run) ti Kannawidan Festival ti Ilocos Sur agsipud iti saan a pannakatungpal ti kari ti provincial government sports organizers a nangted ti insentibo kadagiti runner finishers.

Malaksid dayta, awan pay water stations a naimuntar a kasapulan dagiti runners.

Atap ti kaadduan a dakkel a gatad ti naibulsa ti organizers agsipud ta iti immuna a paset ti acknowledgement kadagiti nakalpas ti fun run, ket nakita ti napuskol a pinapel de bangko agingga a saan pay pulos naipayan ti premyo dagiti maikatlo agpangato a finishers ket indulinen ti organizer ti mapapati a para premyo.

Iti baet a libre ti registration fee ket nagkari ni organizer Jun Almasan nga amin a runner finishers ket maipa-ayan ti insentibo, t- shirts ken special awards para kadagiti ubbing a makalpas ti aktibidad lalon dagiti agtawen ti 8 agingga ti 12.