LAOAG CITY –Pinadayawan ti Department of Education ti Sarrat North Central Elementary School (SNCES) kas Best Implementor ti Brigada Eskuwela iti intero a pagilian.

Segun kenni Mrs. Milagros Malvar, principal ti SNCES a ti naawat da a pammadayaw ket bunga ti panagtitinnulong da kadagiti kameng ti Parent-Teachers Association (PTA), Alumni Association, dagiti mangisursuro, ken nagduduma nga organisasyun.

Kuna na a saanda laeng nga ipatpatungpal ti Brigada Eskuwela no aglukat ti klase ngem iti sibubukel nga schoolyear wenno agingga iti agserra ti klase.

Innayun na a dakkel a tulong dagiti maipapaay nga computers ken libro babaen kadagiti nagduduma a grupo tapno ad-adda pay a mapapintas ti kalidad ti edukasyon iti eskuwela da.

Nasurok nga 44 a ribu a pagadalan iti intero a pagilian ti naglalaban iti nasao a pasalip.