LA UNION - Agpegpeggad ti kasasaad ti maysa nga overseas Filipino worker (OFW) a maipagarup a naglibas manipud iti naulpit nga employer idiay Riyadh, Saudi Arabia.

Iti pannakiuman ti Bombo Radyo La Union iti ina ti nasao nga OFW a ni Adelina Velasco, residente ti Barangay Sevilla, siyudad ti San Fernando, La Union, kinunana a makabulanen a saan a timmawag kenkuana ti anakna a ni Abegail Olarte nga agtratrabaho kas domestic helper iti nasao a pagilyan.

Iti naudi a panagsarita dagiti dua ket agsangsangit nga agis-istorya ti anak iti ina daytoy babaen ti overseases call nga isuna ket basbastusen ken ul-ulpitan ti pagserserbiyanna nga employer a no dadduma ket mapatpaturungan pay ti paltog.

Sigun kenni Velasco, siguden a ginandat ti a naglibas ti anakna ngem natiliw daytoy iti otoridad sadiay ken naisubli iti amo daytoy.

Iti maikadua a gundaway a panaglibas ti OFW ket tinawaganna manen ti nagannakna ken ibagbagana a saanna nga ammo ti pagturungan.

Agpanpanawagan ita ti nasao nga ina iti gobyerno a tulungan isuna a masapulan ti anakna nga agpegpegad idiay pagilayan ti Saudi Arabia.