LAOAG CITY – Nakasagana ni Bise mayor Peter Felix Aguinaldo ti Pasuquin, Ilocos Norte a mangited ti motorsiklo kadagiti tricycle drivers a makaited ti impormasyun mainaig kadagiti pada da a tricycle drivers nga agiwarwaras ti druga.

Inaramid daytoy ti bise mayor kalpasan a naipadanon iti Sangguniang Bayan ken iti police station ti report nga adda ti tricycle driver  a mangip-ipan ti shabu iti uneg ti posporo daytoy.

Immuna iti daytoy ket inbatad ni Sangguniang  Bayan Member William Peralta, c chairman ti committee on transportation nga adda ti maysa a pasahero a saanen a naiganagan nga nagreport nga nakakita ti shabu iti uneg ti posporo nga inyawat kenkuana ti driver ti tricycle nga nagluganan na.

Inlawlawag ti pasahero a saanen a nainaganan a naduktalan na ti kaadda ti shabu iti uneg ti posporo kalpasan nga kiniddaw na iti driver nga makisindi iti sigarilyuna ket inyawat na ti maysa a posporo.

Nupay kasta, idi lukatan na ti posporo ket nakigtot laengen gapu ta saan met a palito ti naglaon no di ket shabu.