LAOAG CITY - Pilit a dimmalan iti caesarean operation iti Gov Roque Ablan Sr Memorial Hospital ni Maria Cristine Agustin, agtawen ti 25, taga Brgy. 9, Sarrat, Ilocos Norte tapno masalbar ti anak na.

Malaksid iti daytoy ket mapagam-amkan –pay a maputol ti sakana gapu ti pannakatukkol na kalpasan a dinungpar ti van ti nagluganan da a sangapamilyaan  a kurung-kurung nga inturong met laeng ti asawa na a ni Gerwin Agustin, agtawen ti 23, residente met laeng iti nasao a barangay ken kadua da ti anakda a ni Yolly Justine Agustin nga agtawen ti 2 bayat nga adda da iti agkurba a paset ti kalsada iti Brgy. Tonoton, Piddig, Ilocos Norte.

Naammuan nga uray ti asawa ti biktima ket natukkol met ti sakana ngem nakarkaru kenni Maria Cristine.

Gapu ta saan metten nga agsardeng ti panagpadpadara ni Maria Cristine ket nagdesisyun dagiti doctor nga idalan ti caesarean operation nupay intono pay laeng agtapos ti bulan ti Pebrero ti “due date” wenno maiyannatup nga aldaw a panagpasngay na.

Ti met anak da a ni Yolly Justine ket nagsagaba laeng ti gasgas.

Naammuan  a lalaki ti inyanak ni Maria Cristine kalpasan ti pannaka-caesarean na ken nasalun –at met daytoy.