VIGAN CITY - Ipagpannakkel ti Ilocos Sur, ti pannakaipuesto ti puro nga Ilocano kas baro nga officer-in-charge ti National Bureau of Investigation (NBI).

Ni Atty. Nonnatus Ceasar Rojas ket naiyanak ken nagtaud diay Brgy. Poblacion, ili ti San Vicente, probincia ti Ilocos Sur nga anak ti de kampanilya nga abogado ken nag-regional NBI director a ni Atty. Cesar Rojas ken ti inana a ni Gerarda, a government employee.

Kuna ni May Valencia Ruada a mangisursuro iti University of Northern Philippines ti Vigan, a kasinsin ni Dir. Rojas, ken nabatbati a kapamilya iti Ilocos Sur, nagadal agingga a nagbalin nga abogado ken nagkapamilya ni Dir. Rojas diaya Project 8, Quezon City agingga nga immakar da diay Cavite.

Inauna kadagiti tallo nga agkakabsat ni Dir. Rojas, ken adda met dua a putot na.

Nabayagen a Region I State Prosecutor ni Rojas agingga a nadutukan, epektibo idi kalman a kas OIC-NBI dir. kasukat ni dati nga NBI director Magtanggol Gatdula.

Inladawan ti kabagyan na iti Ilocos Sur ni Dir. Rojas a simple, napakumbaba, mannakitinnulong ken saan a matawaran ti kredibilidad na.