LAOAG CITY - Napilaan ti kaso a child abuse ti maysa a barangay kagawad iti Dingras, Ilocos Norte gapu ti panangmalmaltrato ken panangbasbastos na iti maysa nga ubing a lalaki nga agtawen ti walo.

Binigbig ni SPO2 Emmanuele Ballesteros, imbestigador ti PNP Dingras ti suspek a ni Brgy. Kagawad Gilbert Tumoc, barangay kagawad ti Brgy. Sulquiano iti nasao nga ili.

Segun kenni Ballesteros, nagreklamo dagiti nagannak iti ubing kontra kenni Tumoc gapu iti sumagmamanon a daras a panangdangran na iti anakda nangruna no saan na a mabaon a gumatang ti sigarilyu.

Basar iti imbestigasyun, nangrugi pay ti panangmalmaltrato ni Tumoc iti ubing idi bulan ti Mayo tay napan a tawen.

Segun met iti ama ti ubing a ni Arthur Garly nga saan laeng a malmaltratuen ti suspek ti anak na ngem ketdi basbastosen na pay iti panangibagana nga ikkan na ti sangaribu a pisos no kayatna nga agkanaig da iti ina na.

Ti suspek ken ti ubing ket agkarruba da laeng.