LA UNION – Nasorpresa ti baro a dinutukan iti Department of Justice kas office-in-charge (OIC) ti National Bureau of Investigation (NBI) a ni regional prosecutor Nonnatus Caesar Rojas.

Iti pannakiuman ti Bombo Radyo La Union kenni Rojas, kinuna daytoy nga arigna a saan a makapapati nga isuna ket pagtaklan iti DoJ a mangidaulo ita ti NBI.

Sigun pay ti opisyal, awan pay iti naawatna a marching orders manipud kenni Justice Secretary Leila de Lima no ania ti unaenna nga aramiden kas OIC director ti opisina.

Immuna iti daytoy, nadutukan ni Rojas kas kasukat ti napatakyas a ni Director Magtanggol Gatdula kalpasan a mairaman daytoy iti maipagarup a kaso a kidnapping for ransom and extortion ti maysa a Japanese national a ni Noriyo Ohara.

Ti nasao nga alegasyon ket nainget met a pinaglibakan ni Gatdula.