LAOAG CITY - Balligi a natiliw ti PNP Batac  iti panangidaulo ni Police Supt. Jericho Baldeo ti maysa a babai a sumangsango ti reklamo  nga large-scale illegal recruitment.

Binigbig ni SPO3 Danilo Belandres, chief investigator ti Batac City ti suspek a ni Roselyn Gamet, agtawen ti 31, awanan ti asawa ken residente ti Brgy. 33, Rayuray iti nasao a ciudad.

Daytoy ket babaen ti bileg ti warrant of arrest nga naawat ti PNP Batac idi laeng malem manipud idiay Baguio City nga inyetnag ni Honorable Judge Monalisa Tiongco Tabora ti RTC Branch 17.

Kuna ni Belandres nga iti agdama ket adda iti kustodiar ti PNP Batac ti akusado ngem mabalin a maikomit iti Batac BJMP apaman a makasarita da ni Executive Judge  Angelo Albano.

Inbatad ti chief investigator a basar iti impormasyun ket uppat dagiti nagbalin a biktima ni Gamet no sadino a rinecruit na ida a mapan idiay Hongkong tapno agtrabaho da kas construction worker.

Rumrumuar a ni Gamet ket adda fiancée na a maysa nga Hongkong national a karaman met laeng iti naiyetnag a warrant of arrest.

Naammuan nga umaboten ti sag-20,000 a pisos ti naala ni Gamet manipud kadagiti rinecruit na.

Awan ti nairekomendar a piyansa para kenni Gamet.