LAOAG CITY – Naduktalan ti Provincial Environment and Natural Resources Office (PENRO) ti Ilocos Norte nga pasig a peke dagiti isu amin a dokumento nga inpakita dagiti driver ken agtagikua kadagiti rinibu a board feet a tarikayo manipud Abulug, Cagayan.

Daytoy ket kalpasan a nalapdan iti naiwayat a checkpoint iti Bacarra, Ilocos Norte babaen ti napagtipon a puwersa ti PNP Bacarra ken Ilocos Norte Police Office ti panagbiyahe dagiti dua a truck nga nagkarga kadagiti tarikayo ken naipanda iti opisina ti PENRO tapno maidalan iti umiso a proseso dagiti nasao a dokumento.

Segun kenni Provincial Environment and Natural Resources Officer, Mr. Juan delos Reyes nga isu amin a dokumento a naipakita nangruna dagiti transfer ken transport documents pakairamanan ti sertipikasyun nga pirmaan ti professional forester ken ti certificate of timber forest products ownership private land for transport ket agpapada a peke kas ipasimudaag ti kaawan ti dry seal dagitoy.

Maipalagip a dagiti nasao a tabla ket maibiyahe a maiturong idiay Vigan City, Ilocos Sur manipud Abulug, Cagayan.