LA UNION - Nagpanawagan ita kadagiti maseknan ti Pilipinas iti sumagmamano nga overseas Filipino workers (OFW) a sungbatan kuma dagiti arunga-ing da gaputa maipagarop a saan a panpansin ti immigration idi indatag da a reklamo kadagiti maipagarop a naulpit nga employers idiay pagilian a Qatar.

Iti interview ti Bombo Radyo La Union kenni Rita Agustin, tubo ti Iloilo ken agdama nga agtatrabaho iti nasao a pagilian kas domestic helper, kinuna na nga arigna awan ti ar-aramiden nga addang iti immigration sadiay tapno sungbatan dagiti reklamo maipapan kadagiti saan a masursurot a kontra ken panangulpit dagiti amo iti sumagmamano a kailyan.

Saan met nga inlibak ni Agustin nga uray isuna ket maysa kadagiti biktima ti saan a panangsurot ti amo na iti napagtulagan ken kurang met iti aw-awaten na a suweldo.

Nakalanad ti kontra segun ti domestic helper, US$400 kada bulan kuma iti awaten na a suweldo ngem kagudua laeng iti maaw-awat na.

Kinuna pay ti Pinay, adda dagiti domestic helpers iti nangidatag met kadagiti reklamo iti immigration gapau ti panangulupit ti nagbalin nga employer ken agtartarigayen nga agawid ti pagilian.

Mangnamnama dagiti OFW ti nasao a pagilian nga isuda ket tulungan ti gobierno ti Pilipinas.