LA UNION - Nakalasat ti maysa a driver kalpasan a naitapwak iti manmanehuenna a dump truck idiay rangkis ti kabanbantayan iti Barangay Lacong, ili ti San Gabriel, La Union.

Iti pannakiuman ti Bombo Radyo La Union kenni barangay kagawad Winceslao Espada Jr. ti nasao a lugar, kinunana a naglaon iti hollow blocks ti nadakamat a lugan a manmanehuen ti saan a bigbig a driver.

Sumangsang-at iti bantay ti truck idi a nagkaaberya daytoy ken naiddepan ti makina kasaruno iti panagratras aginggana a natinnag daytoy ti mapatta-patta a 20 metro a kauneg iti rangkis.

Sigun kenni Espada, nadakamat kenkuan ti driver a nadagsen iti karga ti lugan a makagapu tapno mapasamak iti saan a namnamaen nga insidente.

Naglak-am laeng iti minor injuries ti driver iti naduma-duma a paset ti bagina iti napasamak nga aksidente.

Naammuan nga agturong koma ti nasao a truck idiay maipaspasdek a pagadalan idiay Barangay Lipay Norte ti nasao nga ili tapno i-deliver dagiti hollow blocks a karga daytoy.