DAVAO CITY - Kumpirmadong  gitudlo sa usa ka witness ang usa sa mga suspek nga mipusil patay sa usa ka nurse nga Marjorie Kwan human kini nasikop sa kapulisan kagahapon. 

Giila ang suspek nga usa ka Carlo Millago  taga Sta. Cruz Barrio Patay Agdao ning dakbayan sa Davao.

Sumala ni Police Senior Inspector Ronald Lao sa Sta. Ana Police Station,  nga positibong gitudlo sa nakasaksi ang suspetsado human nga duol lamang siya sa dapit diin nahitabo ang pagpatay sa biktima.

Klaro sab sumala pa ang hulagway sa suspek sanglit wala kini nagtabon sa iyang nawong. 

Gani lakip si Police Senior Inspector Ronald Lao  mituo nga ang ilang nasikop ang usa sa mga responsable sa krimin base na sab sa ilang gipahigayon nga imbestigasyon. 

Nasayran nga atol sa panghitabo, misinyas matud pa ang suspek sa kauban niini nga kawatan ang nahisgutan nga nurse ug kung mosukol kini kanila  ila gilayon kining patyon. 

Gikanayong nalambigit na sab sa nagkadaiyang kaso sa ilang barangay ang dinakpan lakip na ang kaubanan niini nga hangtud karun padayon pa gihapon nga gipangita sa kapulisan. 

Dugang sab sa imbestigasyon nga anaa matud pa sa usa ka suspek nga gawasnon pa hangtud karun ang mga butang ug salapi sa biktima ug igo lamang gihatagan niini ang dinakpan ug  P1,800.00 ayha miikyas. 

Gimonitor na sab karun sa kapulisan ang gikabutngan sa  “at large” pa nga suspek sanglit anaa lamang matud pa kini dinhi sa dakbayan. Samtang naglaum sab ang Sta. PNP nga ila gilayon kining masikop sa hinanaling panahon.