CAGAYAN DE ORO CITY - Subli na usab nga mibukal ang kontrobersya nga giatubang sa Cagayan de Oro Water District kon COWD kabahin sa gitunol nilang water services ngadto sa mga konsumante dinhi sa syudad.

Matud ni Kag Alden Bacal, chairman sa komitiba sa public utility sa konseho nga base sa ilang nadawat nga reklamo nga bisan sa nahitabong bagyong Sendong apan nagpatuman gihapon sa usbaw ilang singil sa bayronon sa tubig ang COWD.

Angayang kasuhan ug contempt ang Cagayan de Oro Water District kon COWD.

Kini usab ang sugyot ni Kag. Ramon Tabor tungod sa maong akusasyon nga gihimo sa COWD.

Matud ni Kag Tabor nga misaad ang COWD nga dili una magpasaka sa presyo sa ilang water services apan wala nila kini tumana bisan sa temporary restraining order kon TRO nga gi-isyo sa korte batok kanila.

Gisugyot karon ni Kag Edgar Cabanlas nga palagputon ang tanang naglangkob sa board of directors sa COWD.

Kini kon dayag ang basehan nga ilang gitugtan ang pagpasaka sa bayronon sa tubig nga gikumsumo sa katawhan sa syudad.

Matud ni Kag. Cabanlas nga angayang may iduso nga resolution aron hangyoon ang buhatan sa mayor nga ipa-recall ang tanang board of directors sa COWD kinsa tinudlo usab niini.

Nasayran nga sa miaging tuig 2011,gipatuman sa COWD ang 30 porsiento nga water rate increase bisan nga hugot nga gisupak sa kadaghanang residente ng lungsod.