CAGAYAN DE ORO CITY - Padayong gi-imbestigahan sa kapolisan ang giingong kaso sa pagpamusil sa usa ka barangay kapitan sa grupo sa mga kabatan-onan diha sa Brgy. Taboc, Opol, Misamis Oriental kagabii.

Naangol sa maong insidente ang biktimang si Ellezer Villaloboz, 23-anyos, nga residente sa Brgy. Taboc sa maong lungsod, apan luwas na kini sa kuyaw nga kahimtang diha sa Northern Mindanao Medical Center.

Matud ni Police Insp. Rogelio Labor, hepe sa Opol Police Station nga subay sa ilang inisyal nga imbestigasyon, nahitabo ang pagpamusil human matud pa tabangi ug kulata sa mga batan-ong lalaki si Brgy. Taboc Kapitan Noel Dosdos.

Giingong natigayon ang pagkulata kang Kap. Dosdos ingon man sa iyang kaubang barangay police, human matud pa nila sitaha ang maong grupo tungod sa ilang pagsugal ug pag-inom sa nasampit nga dapit.

Gikabutyag nga gi-andam na karon sa grupo ni Kap. Dosdos ang pagpasakag kaso batok sa grupo ni Villaloboz, samtang naglaraw usab ang grupo sa biktima nga mopasakag sumbong batok sa maong barangay kapitan.