CAGAYAN DE ORO CITY – Naaresto sa mga operatiba sa Philippine Drug Enforcement Agency kon PDEA-10 ang suspek nga drug pusher nga anaa sa ika-duhang priority target list nga nalambigit sa illegal nga druga sa probinsya sa Bukidnon.

Kini atol sa gihimong buy-bust operation nga gilusad sa mga element sa PDEA ug Bukidnon Provincial Special Enforcement Team sa Poblacion Valencia City sa nasampit nga lalawigan.

Giila sa mga otoridad ang suspek nga si Evella Babela y Boholano aka Bella, 46 anyos, separada ug molopyo ra usab sa maong dapit.

Gibutyag ni PDEA Regional Director Roberto S. Opeña nga ilang nasikop si Babela atol sa iyang pagbaligya sa usa ka sachet sa shabu ngadto sa usa ka PDEA agent.

Nakuha usab sa iyang posisyon ang laing doce pa ka sachet sa shabu, usa ka stick sa gituho-ang marijuana, usa ka aluminum foil ug duha ka disposable lighter.