PIKIT, North Cotabato - Gisunog sa mga armadong grupo ang library sa usa ka tulunghaan alas-7:30 sa gabii niadtong Sabado didto sa probinsiya sa Cotabato.

Si Cotabato Police Provincial Director S/Supt Cornelio Salinas nga gisulod sa mga armadong kalalakin-an ang Gocotan Elementary School sa Barangay Gocotan, Pikit diin ilang gisilaban ang library gamit ang gasoline og gisindihan.

Dali sab nga miiskapo ang mga suspetsado nga gikatuohan nga posibleng mga miyembro sa mga armadong grupo sulod sa Liguasan Marsh.

Naabo ang library sa Gocotan Elementary School apan wala na kini makatabok sa laing School building gumikan semento nga pader ang ilang utlanan.

Walay nahimo ang mga sibilyan ug mga opisyal sa barangay gumikan pulos armado sa mga tag-as nga matang sa armas ang naasoy nga grupo.

Gibana-banaan nga mokantidad sa P1.7 million ang naugdaw sa mga libro ug ubang kagamitan sulod sa library.

Dunay grupo na nga gidudahan si Pikit Mayor Sumulong Sultan nga maoy nagsunog sa library nga padayon karong gi-imbestigahan sa otoridad. (Bombo Garry Fuerzas)