BUTUAN CITY - Gisusi na ni natural environmentalist Gina Lopez uban ni Mines and Geo-sciences Bureau kon MGB Director Leo Nazareno ang kinatibuk-ang mining site sa SR Mining Incorporated sa nahimutang sa Brgy. La Fraternidad, lungsod sa Tubay.

Gikumpirma kini ni Tubay Vice Mayor Fidel Garcia dungan sa pagpasabot nga gustong sutaon sa maong mga opisyal ang sitwasyon sa maong dapit kansa maoy site sa nickel, cobalt, iron og ore mining.

Giklaro usab ni Garcia nga buot sutaon nila Lopez og Nazareno ang kamatu-uran sa mga isyung gihapak batuk sa maong kompanya sama sa nahatud niining environmental degradation tungod sa ilang open pit mining nga maoy nakaguba sa kabukiran.

Anaa pa ang pagpasira matud pa sa maong kompanya sa coastal road hinungdan nga dili na maagian sa mga tawo ang dalan gikan sa Binuwangan ngadto na sa Lawigan og kinahanglan pa nilang mutabok sa Calinawan River.

Gidugang pa sa besi mayor nga gusto lang maklaro sa mga mibisitang opisyal ang kamatu-uran sa maong isyu sa balanse og patas nga paagi.

Gawas pa, gitayming na usab kini ni Lopez aron mapakusgan ang ilang kampanya batuk sa open pit mining.