DAVAO CITY - Dismayado ang opisyal sa Eastern Mindanao Command (Eastmincom) sa administrasyon sa Assumption College of Davao tungod padayon pa gihapon nga gibutang sa atubangan sa gate sa ilang tulonghaan ang usa ka streamers nga daw gipasanginlan ang Armed Forces of the Philippines (AFP) nga maoy utok sa pagpatay sa paring si Fr. Fausto “Pops” Tentorio.

Sumala ni Colonel Leopoldo Galon Jr., Eastmincom spokesperson, nga bisan pipila ka bulan na ang nakalabay nga nasikop sa National Bureau of Investigation (NBI) ang nag-unang suspek sa kamatayon ni Tentorio, padayon pa gihapon karun nga gibutang ang streamers sa nahisgutan tulonghaan nga adunay pulong nga "Stop Killing Religious Leaders Under Oplan Bayanihan". 

Dugang ni Galon nga dili makatarunganon ang maong mensahe alang sa mga sundalo nga namatay sa giyera arun lamang panalipdan ang katawhan.

Gikanayon sab sa opisyal nga usa ka pagpang-brainwash lamang sa mga tinun-an ang tumong sa maong streamers lakip na ang mga tawo nga anaa sa palibot  arun nga motuo sa mga bakak Communist Party of the Philippines (CPP).

Buot sab sumala pa sa maong streamer nga wagtangon ang pagsalig sa katawhan ngadto sa militar lakip na sa ilang gilusad  nga programa nga alang sa kalinaw.