BUTUAN CITY - Kupirmadong gidagit sa gibana banang 200 ka mga armadong meimbro sa New People's Army ang resident Manager sa Taganito Mining Corporation nga si Mr. Jose B. Anievas human nga giatake ang maong kompanya pasado alas-10:30 kaganinang buntag.

Gawas kang Anievas, gidala pa ang duha ka wala pa mailang VIPS ug ang security guards. Base sa report, gisakay matud pa ang gropo ni Anievas sa mga rebildeng NPA sa usa ka Grandia color gray nga padulong sa project area sa Taganito Mining sa Hayanggabon, Claver Surigao del Norte.

Samtang ang ubang gropo sa rebildeng NPA ang nagpahigayon ug road block sa Baoy Bridge nga anaa sa boundary sa Claver-Gigaguit ug ang uban sa Brgy. Hayanggabon ug sa sitio Capangan Brgy. Urbiztondo ug sa Claver Public Cemetery.

HUman matud pa ang pag-atake sa Taganito Mining Corporation, gisunod sa gatusang mga rebilde ang pag-atake sa Platinum Metals Group Corporation nga anaa sa Sitio Kinalalabhan Cagdianao Claver Surigao del Norte.

Nakasulod matud pa sa nasangpit nga kompanya ang mga rebildeng NPA, human nga gidis-armahan ang mga gwardiya niini.

Gikumpirma ni Gov. Sol Matugas nga dili maihap sa mga heavy equipments ang gisunog sa mga rebildeng NPA apil na niini ang dumptrucks, upat ka barges, official buses, service vehicle ug ang motor pool sa taganito Mining Corporation. Duna usab matud pay gitanom nga landmines ang mga NPA sa maong kompanya.

Tungod sa duha ka sunod sunod nga pagpangatake, daling gipahigayon ang joint hot pursuit operation sa hayanggabon patrol base, 13th RPSB, Claver M unicipal Police Station ug tropa sa DRC 4ID Philippine Army.

Duna nay gipadala nga duha ka helicopters gikan sa Philippine Air Force nga nakabase sa Davao City padulon g sa Taganito Claver Surigao del Norte alang sa air support.

Gikondena ni Police Regional Office-13 Director Pol. Chief/Supt. Reynaldo Rafal ang nasangpit nga terroristic acts sa mga rebilde.

Nanawagan usab si Director Rafal sa mga katawhan nga makig koordinar ug musumbong sa kapulisan kung dunay nahibaluan sa nahimutangan karon sa mga rebildeng NPA alang sa dinaliang kaluwasan sa mga bihag sa mga walhong gropo.