BUTUAN CITY - Welcome sa Kapisanan ng mga Brodkaster ng Pilipinas kon KBP ang subling pagbuhi ni Pangulong Noynoy Aquino sa Executive Order No. 225 nga gipagawas niadtong tuig 1987 sa iyang inahang si kanhi Pangulong Cory Aquino kondiin gimanduan ang tanang radio stations sa Pilipinas pagpatukar og upat ka original Pilipino music kon OPM kada oras.

Sa eksklusibong pakighinabi ning sibyahan kang KBP national President Herman Z. Basbaño kinsa mao usa'y besi-presidente og chief operating officer sa Bombo Radyo Philippines, iyang gibutyag nga usa kini ka maayong pagpahinumdum sa tanang Filipino aron i-promote ang mga orihinal nga kantang Pinoy kansa maka-ayo sa atong kultura og maka-ayo usab sa music og broadcast industries.

Gidugang sa opisyal nga maghulat pa siya og dugang kalambuan kalabot niini nga kamanduan kansa iyang nakita nga gipatuman na sa kadaghanang mga FM stations gawas lamang niadtong nag-adaptar og lahi nga format sa broadcasting.

Kini karon ang ilang tan-awon og tun-an aron masegurong mapatuman gyod og sakto ang nasangpit nga EO 225.