GENERAL SANTOS CITY - Gibutyag sa mga fire investigator sa Sarangani Province nga posibleng adunay foul play sa pagkasunog sa karaang municipal hall building sa Maasim, Sarangani Province.

Matud ni S/Insp. Jeraniel Taporco, acting provincial director sa Bureau of Fire Protection-Sarangani, nga nakakita sila og mga ebidensya nga mutudlo sa arson isip posibleng hinungdan sa kalayo nga miugdaw sa karaang municipal hall sa Maasim niadtong Agosto 3.

Nagdumili na hinuon si Taporco sa paghatag og dugang detalye sa ilang imbestigasyon samtang gikatakdang ipresenta kini sa mga hingtungdang opisyal sa Sarangani Province.

Samtang gikumpirma usab nga nagsugod ang kalayo sa Community Development Information Office sa nasangpit nga municipal building.

Nasayran na mokabat sa P7 milyon ang nahimong damyos sa sunog wala pay labot ang mga computers ug ubang kagamitan.