BUTUAN CITY - Sa ikaunom nga higayon gi-harrass sa rebeldeng New Peoples Army (NPA) ang patrol base sa militar nga nahimutang sa Purok 5 Diatagon Lianga Surigao del Sur.

Sa interbyu ng Bombo Radyo Butuan kang 1Lt Col Agustus Tolentino, gi-atake sa mga rebelde ang ilang kampo sa lugar nga maoy naghatag seguridad sa mga kabtangan nga gibutangan sa mga kahimanan sa military engineers alang sa road construction og sa barangay water system.

Dugang ni Lt Col Tolentino, nakadawat usab siya og impormasyon nga gi-haylo pa sa mga rebelde ang mga residente sa nahisgutang lugar nga mamakwit aron ipakita sa panggamhanang lokal nga supak kini sa proyektong pangkalambuan nga gi-implementar sa kasundaluhan sa area.

Pasabot sa opisyal, gawas sa gihimong paghaylo, nihimo usab kini sa subsob nga pagpangatake sa ilang kampo aron mapugos ang mga katawhan sa pagbakwit sanglit dile buot ang mga rebelde nga molambo ang naasoyng lugar.

Subay niini, nagpahigayon na ang militar sa clearing operation sa lugar sanglit bisan ang mga CAFGU nibati na og kahadlok sa pag-duty.

Kahibaluan nga gi-harrass ang nahisgutang kampo niadtong Hulyo 28, 29, 31 og Agosto 4, 6 og ang pinakaulahi kaganihang buntag.