CAGAYAN DE ORO CITY-Ipaubos sa otopsiya ang patay'ng lawas sa usa ka lalaki nga nakaplagan sa kamalig diha sa Zone 10, Cugman ning syudad. Naila ang biktima nga si Luis Lumain, 47 anyos nga residente sa maong lugar.

Adunay samad ug lagom sa li-og sa biktima nga gitoohang maoy hinungdan sa iyang kamatayon.

Matud ni Police Insp. Eulesis Gere, hepe sa Cugman Police Precinct nga pinaagi sa otopsiya, ilang masuta kon agi sa dinunggaban o kaha pinaakan sa halas ang samad nga nakita sa li-og sa biktima.

Una niini, gitoohan sa pipila ka mga residente sa maong lugar nga posibleng gipaak sa balbal ang maong biktima nga nagresulta sa kamatayon niini.

Matud ni Vergie Ramos nga posibleng gipaak sa balbal ang biktima kay daghan matud pa ug aswang sa ilang lugar.

Dumdumang niadtong miaging mga bulan, adunay mga babaye sa pipila ka barangay dinhi sa dakbayan ang nakuhaan sa ilang gisabak nga gitoohang hinimoan sa balbal.