CAGAYAN DE ORO CITY - Kasong kidnapping for ransom ang  atubangon sa tulo ka pulis nga suspek sa pagdagit sa usa ka 11-anyos nga tinun-an diha sa Brgy. Gusa ning syudad niadtong miaging tuig 2009.

Kini human pabori sa panel of prosecutors ang giduso nga motion for reconsideration sa mga complainant ngadto sa korte.

Nalatid sa pinirmahang resolusyon gikan sa City Prosecutor's Office nga adunay gimbug-aton ang reklamo nga giduso nila ni Mayor Hakim Abinal ug Sobaida Potawan batok sa mga suspek nga sila si SPO3 Rico Justalero, SPO2 Conrado Gomez, PO3 Benjamin Jay Reycitez ug usa ka Macalanding Ladayo alyas Ding.

Dumduman nga subay matud pa sa mando ni Macalanding,gisignit sa tulo ka pulis ang biktimang si Salal Pangandaman gikan sa iyang tunghaan diha sa Gusa ug gilayong gidala sa Alae, Manolo Fortich, Bukidnon.

Nalatid usab sa gidusong reklamo sa ginikanan sa biktima nga mahimo lamang kining buhian sa mga suspek kon makabayad sa ransom money balor P10 milyon.