GENERAL SANTOS CITY - Nagpabiling huhungihong ang migawas nga taho nga adunay mga mananagat nga namatay sa lawod nga haduol sa Indonesia ug didto matud pa gidunggo sa Mati, Davao Oriental.

Dinhi sa Gensan Philippine Coastguard, gikanayon ni Commander Charlie Ranses nga mitawag na sila sa Mati ug nahimo matud pang negatibo ang report.

Sa pakighinabi usab sa Bombo Radyo Gensan kang Lt. Rammil Palabrica sa Mati Philippine Coastguard, gibutyag niini nga mipahigayon sila ug meeting kauban si Mayor Michelle Rabat ug gihisgutan ang maong report.

Mimugna sila ug Task force ug gihatagan ug lugway nga tukion ang report hangtud sa adlaw'ng Miyerkules.

Matud ni Lt. Palabrica, nakadawat sila ug taho nga 31 ka mga mananagat ang namatay human mikaon sa linuto nga langgam ug pagdunggo sa Mati sakay sa bangkang Shiela Rose, gipangkarga ang mga nasampit sa fish car ug gibiyahe padulong dinhi sa Gensan.

Ang maong report wala gihapoy kumpirmasyon.

Aminado si Lt. Palabrica nga naalarma si Mayor Rabat sa report hinungdan gipaberipika.