DAVAO CITY – Anggulong dunay kalabotan sa gugma ang gisundan sa mga police sa Davao del Sur sa pagkapusil-patay sa public school principal Arielito Margate, 33, residente sa Poblacion, Kiblawan, Davao del Sur ug principal sa Isabelo Calma Elementary School sa Balasiao, Kiblawan, Davao del Sur.

Nasayran sa Bombo Radyo Davao gikan kang Police S/Supt. Ronald de la Rosa, Davao del Sur PNP provincial director nga sa ilang imbestigasyon nasayran nga dugay na nga nakadawat ug hulga sa iyang kinabuhi ang principal gumikan sa pagpakig-live in niini sa usa ka dalaga nga dunay ka relasyon nga taga DPWH.

Sumala kay dela Rosa nga ang nahisgutan nga anggulo mao ang ilang ginasundan hangtud nga mahatagan ug sulbad ang krimin.

Mahinumduman nga kagahapon sa buntag gipusil-patay ang principal samtang motambong unta sa seminar nga gipahigayon sa Department of Education (DepEd).