NAGA CITY - Nahahampang ngonian sa patong-patong na kaso an sarong bombero matapos na magwala sa syudad nin Naga kasubanggi.

Sa entribista kan Bombo Radyo Naga ki PO3 Norman Borbe, sinaysay kaini na kabilugang 10 mga barangay tanod kan Barangay Sta. Cruz sa naunambitan ng syudad an nagsangat nin kasong “direct assault to person with authority” asin “grave oral defamation” ki FO1 Raymond Timothy Joseph Federa kan Bureau of Fire Protection sa banwaan kan Milaor.

Enot digdi, inareglo sana kuta na kan mga otoridad an suspek asin an tanod na si Alexander Besing makalihis na purbaran su boot kaining budalan.

Alagad sa kaanggutan nagbueltada pa an naunambitan ng bombero asin dinumanan an mismong barangay hall kun saen pigparamuda asin pigpaerataraman kaini nin mararaot na tataramon an mga tanod sa lugar.

Huli digdi, liwat na nagresponde an mga otoridad alagad maging an mga ini su boot, pigparalamuda man kan burat na suspek asin pigbantaan pa an kaibanan nindang bados na pulis.

Napag-araman na bako sana ini an primerong beses na nagwala an suspek na mga records na man su boot sa naunambitan ng hepatura.