LEGAZPI CITY - Dagos ng napasakamot kan mga awtoridad an pinagsusupuniran na nasa likod kan sunod-sunod na panghoholdap na nangyari sa provincia kaining mga nakalihis na aldaw.

Matapos an dragnet operation na isinagibo kan Albay Police Provincial office asin Legazpi City PNP, naaresto an mga suspek na binistong sinda Nante Aquino y Alegre, 39-anyos kan Kagandahan St. Kawilihan village Pasig City asin Sheen Anciano na gikan man sa ciudad nin Naga.

Enot kaini, positibong binisto kan saru sa mga biktima kaini an mga suspek matapos an pinakahuring pambibiktima kaini sa banwaan kan Camalig Albay kasubago sana man.

Sa intrivista kan Bombo Radyo Legazpi ki Pol. Sr. Supt. William Macavinta, kinumpirmar kaini an tulos na pagsasangat nin kaso kontra sa mga suspek na apwera sa pigsusuponiran na nasa likod kan panghoholdap sa nagkapirang money remittance center, pigsasabing ini man an lider kan budol-budol gang na uminatake sa provincia kan mga nakalihis na aldaw.