LEGAZPI CITY-- Bukas an liderato kan Phil. Army sa Bicol region na ipresentar ki Anak Pawis Coordinator Allan Flores an kabilugan na 12, 000 na mga miembros kan militar asin CAFGU sa rehiyon ngani na maitukdo kun siisay sa mga ini an sinasabing nasa likod kan pagdukot sa saiya kan nakalihis na Enero 31 kan presenteng taon.

Ini an bweltada ni Maj. Angelo Guzman, tagapagtaram kan 9th Infantry Division ng Phil. Army, sa ipigbuyagyag ni Flores na militar an responsable sa pagdukot sa saiya.

Sa entrevista kan Bombo Radyo Legazpi, inagyat ni Guzman an sinambit na biktima magin an grupo kan Karapatan- Bicol na iyu an nagkukustudiya digdi na opisyal na ipa- record sa PNP an insidente asin preparado sindang magsuporta kun magkakaigwa nin imbestigasyon.

Duda man si Guzman na traumatized si Flores, huli ta detalyado soboot an pag- istorya kaini dapit sa saiyang nagin experiencia.

Mahigot na pinahimutikan kan militar na nagsasagibu sinda kan siring na mga operasyon huli ta higot ining ipigbabawal kan ley.

Enot digdi, sarong Corporal Alexander Sierdon an pinangaranan na nasa likod kan abduction ki Flores kan nakalihis sanang aldaw nin Martes.