LEGAZPI CITY-- Matinding trauma an naexprienciahan kan coordinator kan Anak Pawis na si Allan Flores makalihis na ini an dukuton sa provincia nin Camarines Sur.

Uminabot nin duwang aldaw an sakripisyo asin takot ni Flores sa kamot kan saiyang mga abductors kun saen napag- araman na obheto kan mga ini na makakua nin impormasyon gikan sa saiya.

Sa eksklusibong entrevista kan Bombo Radyo Legazpi sinabi ni Flores na kun anu- ano an pighapot sa saiya kan mga armado asin labi niyang ikinahandal kan madangog an pig- uulayan kan mga ini na mayo man na makukuang importanteng impormasyon sa saiya kun kaya mas marhay kun siya an gadanon na sana.

Nagtutubod si Flores na mga miembros kan militar an nagdukot sa saiya huli ta antes pa ma nangyari an pagdukot, nakaresibe na siya nin serye nin mga huma gikan sa tropa kan gobierno.

Istorya pa ni Flores, mayo soboot sindang ibang ginibu kundi mag- viaje, maglakaw mantang nakapiring an saiyang mga mata.

Ipigbuyagyag pa ni Flores na nakaexperiencia man siya nin sampaling gikan sa saro sa mga suspetsado.

Pebrero 2 kan basta na sanang ipigwalat kan mga armado an biktima sa sarong barangay sa primer distrito kan Camarines Sur asin duman na siya nakahagad nin tabang.

Si Flores an dinukot kan nakalihis na Enero 31, pasado alas- 9:00 nin aga sa may porsyon kan San Roque, Lagonoy.