Akeanon News

KALIBO, Aklan - Kumpiyansa si Governor Carlito Marquez nga maangkon it probinsya ro target nga 1 million tourist arrivals sa isla it Boracay makaron nga 2012.

Suno sa Gobernador, posibleng magsobra pa sa 1 million nga ka mga turista ro magapadueong sa isla bangud sa naga-inabo nga direct ag international flights sa Kalibo International Airport o KIA.

Kadungan man it pagdagsa it mga local ag foreign tourists sa isla, iga-improbar ro pila ka mga pasilidad sa Jetty Ports ag pati eon ro Boracay Hospital tuga it kueang pa sa mga importanteng gamit ro nasambit nga baeay paboengan ag kinahang-ean pa raya nga i-expand.

Sa kamatuuran, magatao man ro Department of Health o DoH it P40 milyones mag-euwas pa sa dugang nga pondo nga naghalin sa Korean International Cooperative Agency o KICA para sa nasambit nga improvement ag renovation.

Samtang ginkumpirma man ni Marquez nga bukon eamang it ro Boracay hospital ro gintaw-an it pondo it KICA kundi pati man ro Provincial, District ag Municipal hospitals sa Aklan.

Sa pihak man nga parte, mas pa nga ginapasanyog sa makaron it Provincial Government ro angot sa Real Estate Taxation para nga maimprobar ro revenue generation sa katuyuan nga maitao sa mga pumueuyo ro mga nagakaigo nga serbisyo kapareho it social ag health services, pagpa-repair ag construction it mga school buildings ag iba pa.