Akeanon News

KALIBO, AKLAN --- Arestado ro sangka insurance agent matapos nga ireklamo it pagpangloko it leader it Ati community sa Brgy. Bulabog sa isla it Boracay.

Kulong makaron sa Boracay Special Tourist Protection Office ro suspek nga nakilaea kay Geric Gumboc, residente it Looc, Romblon matapos nga akusahan it biktima nga nakilaea kay Delsa Justo, 52-anyos ag residente it nasambit nga lugar it pagpangloko pinaagi sa pagkolekta it insurance payment kada buean nga nagabalor it P650 umpisa ko Agosto 2010 hasta Disyembre 2011 sa pihak nga bukon eon raya it konektado sa St. Peter Insurance.

Base sa ginabuytan nga resibo ni Mrs. Justo, naga-abot eon sa P8,450 ro nakolekta kana it nasambit nga pekeng agent nga owa na-remit sa andang opisina.

Nasayuran nga napataksik sa trababo si Gumboc bangud sa nahimo man kara nga kaparehong scam sa probinsiya it Romblon.

Nasakote ro suspek matapos nga oman raya nga nagbalik sa baeay it biktima agud nga mag-collection eon man kunta, apang insigidang gin-timbrehan ro mga pulis rason nga raya hay naaresto.

Narekober kana ro mga tampered nga resibo nga ginagamit sa anang pagpangloko.

Sa makaron hay ginatumod pa it mga awtoridad kon may iba pang naloko ro suspek gamit ro nasambit nga scam.