Akeanon News

KALIBO, AKLAN --- Na-ospital ro sangka eaeaki matapos nga maka-inom it gasolina nga nakasueod sa galon nga nasae-an kara nga tubi.

Ro biktima hay nakilaea kay Rodson Pintor, sa legal nga edad ag residente it Brgy. Man-up, Batan, Aklan.

Base sa report, gaoy ag masyadong uhaw sa tubi nga nag-uli ro biktima sa andang baeay halin sa anang trabaho. Ginasugid nga matapos nga makita ro galon hay nagbo-oe raya it baso ag gintigis ro sueod kara sa pagpati nga raya hay tubi.

Naka-inom gid sigon ro biktima it gasolina rason nga nakabatyag it pagkahilo nga insigida man nga gindaea it anang pamilya sa Aklan Provincial Hospital.

Naka-oxygen hasta sa makaron ro biktima sa sueod it isolation room it nasambit nga ospital ag padayon nga ginabueong it anang mga doktor.