Akeanon News

KALIBO, AKLAN --- Opisyal nga igalunsar hin-aga nga adlaw ro Code Blue Boracay Reef Bud Project nga nagatuyo nga mapanumbalik ro marine habitat sa isla it Boracay.

Suno kay Atty. Bobet Malaga nga ro nasambit nga proyekto hay may kahabaon nga daywang kilometrong ag may eapad nga kapin sa 7,000 square meters nga kon sa siin 5,000 nga mga reef buds ro igahueog sa baybayon it isla nga may eapad nga 1.2 x 1.2 meters ag 500 hasta 600 kilos ro bug-at.

Ginpaathag ni Atty. Malaga nga ro insigidang epekto it reef buds hay agud nga matubuan it mga pagkaon it isda kapareho it marine plant nga algae , planktons ag iba pa.

Mag-eowas kara, bilang baeay, pwede man nga ma-itlugan it mga isda ro nasambit nga lugar kamana man nga magaserbing abang sa soil erosion eabi eon sa tiempo it habagat nga kon sa siin hay masyadong mabaskog ro humbak.

Dugang nga atraksyon man sigon ro proyekto sa mga turista bangud sa pag-abu it mga nagkaeain-eain nga isda sa isla ag mas pa nga mapa-abu ro mga corals nga imao ro nagatuga it white sand.

Nasayuran nga ro proyekto hay ginpunduhan ni Senador Loren Legarda ag igapatuman it Kalikasan cooperative, Boracay Association Scuba Dive Schools, PCCI-Boracay ag LGU-Malay.

Sa makaron ro Boracay hay nagapangunang tourist destination sa bilog nga Asya samtang pangaywa sa bilog nga kalibutan.