Akeanon News

KALIBO, Aklan – Nagapangatubang sa patong-patong nga kaso rong sangka 42-anyos nga american citizen matapos nga masakote it mga katapo it Provl. Intelligence Branch Operative (PIBO) pinaagi sa gahum it search warrant kat mabuoe sa anang posisyon ang kontrol rong ginaboebanta nga 20 mil pesos nga balor it marijuana.

Nakilaea rong suspek kay Martwin Reyes "alias" Nior ag Martin ag residente it Purok 2 Brgy. Navitas, Numancia, Aklan.

Mag-euwas sa narekober sa suspek, nakit-an man sa anang kuarto ro 3 ka improvised tooter, foil, kuarta, 1 nga pipa ag 1 cube it marijuana nga nasueod sa nabutangan it film sa camera.

Sa paghalughog pa it mga kapulisan tumanbad man kanda rong 2 nga puno it marijuana nga nakatanum sa balde nga nahamtang sa kilid it baeay ku suspek kun siin man imaw kara gin-aresto.

Nasayuran nga nabuoe sa suspect ro 13 tanan ka putos it marijuana kun siin ginpamalibaran kara nga nagabaligya imaw it nasambit nga illegal nga droga kundi nga nakonsumo manlang segun nana raya.

Magapangatubang sa nagkaea-eain nga kaso ro nasambit nga suspect bangud sa pagbayolar kara sa Republic Act 9165 o mas kilaea sa Comprehensive Dangerous Drugs Act of 2002 partikular ro cultivation, pushing ag illegal possession of illegal drugs .