Akeanon News

KALIBO, Aklan - Kumita it kapin sa P3.194 million ro bag-o eamang natapos nga Kalibo Sto. Niño Ati-Atihan festival 2012.

Ginkumpirma ni Albert Menez, chairman it festival organizer nga Kalibo Sto. Nino Ati-Atihan Foundation, Inc. (KASAFI) nga ro nailistang kita hay mas mataas it 75 porsyento kumpara ko nagtaliwan nga dag-on nga naga-abot eamang sa P1.835 million.

Base sa internal audited financial statement it festival makaron nga dag-on, nagapakitang ro mabahoe nga gingastusan it KASAFI hay ro cash prizes para sa mga nagdaog nga tribu ag indibidwal, subsidy para sa mga nagpasakop nga tribu, materyales nga gingamit, souvenir program, sweldo sa mga tawuhan, renta sa mga portalets ag iba pa.

Samtang, ro mabahoe nga naging source it kita hay ro sponsorships ag donations, ticket sales sa nagkaeain-eain nga aktibidades it festival kamana man ro kita sa advertisements, space ads ag iba pa.

Bangud sa madinaeag-on nga Ati-Atihan festival makaron nga dag-on, ginpasiguro ni Menez nga pagapataasan ro financial assistance para sa mga magapasakop nga tribu ag premyo sa street dancing competition sa masunod nga dag-on.

Nasayuran nga kabilugan nga 30 nga Ati-Atihan tribes ag dinosena nga iba pang indibidwal para sa Balik Ati category ro nagpasakop sa dag-unan nga street dancing competition makaron nga dag-on.