KALIBO, Aklan - Opisyal na ilulunsad ang Code Blue Boracay Reef Bud Project na naglalayong mapanumbalik ang marine habitat sa isla ng Boracay.

Ayon kay Atty. Bobet Malaga na ang naturang proyekto ay may habang dalawang kilometro at lapad na nasa 7,000 square meters kong saan 5,000 na mga reef buds ang ihuhulog sa baybayin ng isla na may lapad na 1.2 x 1.2 meters at 500 hanggang 600 kilos ang bigat.

Ipinaliwanag ni Malaga na ang agarang epekto ng reef buds ay upang mapatubuan ng mga pagkain ng isda kagaya ng marine plant na algae, planktons at iba pa.

Maliban dito, magsisilbi rin itong bahay na maaari pangitlugan ng mga isda ang naturang lugar gayundin na magsisilbi itong harang sa soil erosion lalo na sa panahon ng habagat na kung saan ay masyadong malakas ang alon.

Dagdag na atraksyon din umano ang proyekto sa mga turista dahil sa pagdami ng mga ibat-ibang isda sa isla at lalo pang dadami ang mga corals na siyang pinagmumulan ng white sand.

Napag-alaman na ang proyekto ay pinondohan ni Senador Loren Legarda at ipapatupad ng Kalikasan Cooperative, Boracay Association Scuba Dive Schools, PCCI-Boracay at LGU-Malay.

Sa ngayon ang Boracay ay nangungunang tourist destination sa buong Asya habang pangalawa sa buong mundo.