Iginiit ngayon ng panig ng depensa na "hearsay" lamang ang mga naging pahayag ni Justice Sec. Leila de Lima sa impeachment trial kaugnay sa pagtestigo nito sa Article 7 kaugnay sa inilabas na temporary restarining order (TRO) na inilabas ng Korte Suprema hinggil sa balak na pagpagamot sa labas ng bansa ng dating Pangulong Gloria Macapagal-Arroyo at dating First Gentlemen Mike Arroyo.

Ayon kay Atty. Karen Jimeno, isa sa tagapagsalita ni Chief Justice Renato Corona, hindi maituturing na "competent witness" si de Lima dahil wala itong alam sa detalye ng botohan ng mga justices dahil wala naman ito nang maganap ang botohan.

Binigyang diin naman ni Defense Spokesman Atty. Rico Quicho, walang bago sa mga sinabi ng kalihim dahil una na nitong inihayag sa publiko ang mga binitawang pahayag sa witness stand.

Naniniwala ang defense panel na hanggang ngayon ay wala pang matibay na ebidensya at testigo ang prosecution laban kay Corona.