Naging maluwag ang  pagtanggap ng impeachment court kay Justice Sec. Leila de Lima bilang testigo ng prosekusyon kaugnay ng umano'y pagtataksil ni Chief Justice Renato Corona sa tiwala ng taong bayan nang paboran nito si dating Pangulong Gloria Macapagal-Arroyo para  makakuha ng temporary restraining order (TRO) mula sa Korte Suprema laban sa inilabas na travel ban ng Department of Justice (DoJ).

Katunayan sa kabila ng panghaharang ni defense lead counsel former Justice Serafin Cuevas, pinayagan pa ni Senate President Juan Ponce Enrile na isalaysay ni De Lima ang pinagbatayan at proseso ng paglabas nito ng watchlist order (WHO) laban kay Arroyo bago ang inilabas na TRO ng kataastaasang hukuman.

Kabaliktaran ito sa nangyaring  pagdinig nitong nakalipas na araw ng Martes kung saan ay hindi pinayagan ng impeachment court ang testigo ng prosekusyon na si Enrique Javier ng Philippine Airlines (PAL) para  tumestigo sa Article 3 ng impeachment complaint dahil umano sa kawalan ng kaugnayan sa pinag-uusapang asunto.

Maliban sa direct examination ni House prosecutor Rep. Raul Daza, kabilang naman sa mga senador na tumayo para magtanong kay De Lima ay si Sen. Ramon "Bong" Revilla Jr., kung saan diretsahan nitong tinanong ang kalihim kung may direktang kautusan ang Malacañang para harangin ang balak ni Arroyo na mag-abroad sa kasagsagan ng paghahanda ng kanyang kaso, bagamat itinanggi ito ng testigo.

Tinanong din ni Enrile si De Lima kung may solong ginawa si Corona para maipatupad ang TRO laban sa WHO ng DoJ kung saan agad namang sinagot ng  kalihim na wala, ngunit malaki umano ang impluwensya ng punong mahistrado sa kasamahan nito para kampihan ang dating pangulo.

Hindi pa tapos ang pagtestigo ni De Lima sa pagdinig kung saan pinababalik ito bukas para sa pagpapatuloy ng cross examination ng depensa.