GENERAL SANTOS CITY - Sumabog ang mga nakaimbak na armas ng Regional Public Safety Battalion sa Police Regional office sa Tambler sa lungsod ng GenSan.

Ito'y matapos tinupok ng apoy ang buong edepisyo kaninang tanghali.

Sinabi sa Bombo Radyo ni P/Supt. Resty Damaso, information officer ng PRO-12, na iimbestigahan na ang pinagmulan ng apoy na tumupok sa buong building na nagresulta sa pagkasunog sa buong armary na naglalaman ng dalawang M60 machine gun, mga mortar tube at mga bala, mga eksplosibo, granada, hinde matukoy na bilang ng M16 rifles, M203 grenade launcher, mga bala, computers at mga dokumento.

Hinihintay na ni Police Regional Director Benjarde Mantele ang pagpapalabas ng investigation report galing kay S/Supt. Roque Alcantara, commanding officer ng RPSB sa pinagmulan ng sunog.

Ang nasabing gusali ay command post ng Regional Mobile Group na ngayon Regional Public Safety Battalion na makikita sa entrada lamang ng punong himpilan.