Nilinaw ngayon ng House prosecution panel na hindi maituturing na pag-amin ng kahinaan ang pagbabawas nila ng mga ebidensiya at testigo para sa ikatlong artikulo ng impeachment complaint.

Ito ang tahasang tinuran ni prosecution spokesman at Quezon Rep. Erin Tanada, kasunod ng ginawa nilang pagtalon sa ika-pitong reklamo laban kay Chief Justice Renato Corona.

Ayon kay Tanada sa panayam ng Bombo Radyo, patunay pa nga ito ng kanilang malakas na pwersa matapos magbigay ng kumpyansa sa kabila ng isang testigo lamang ang kanilang nailahad para sa isyu ng pagbaliktad ng desisyon ng Korte Suprema.

Nilinaw din nitong bago pa man sumalang sa day 22 ng paglilitis ang kanilang kasamahang si Isabela Rep. Giorgidi Aggabao, napag-usapan na ito ng buong lupon mula sa Kamara.

"Nagkasundo po kami, sa pangunguna ni Cong. Gigi Aggabao na 'di na isama 'yong ibang parte ng article. Sapat na naman po 'yong ating mga evidence natin dun," wika ni Tanada sa panayam ng Bombo Radyo.