Maliban sa madaliang pagpasa sa impeachment case, nasilip din ni Sen. Ping Lacson na tila naunahan ng yabang ang mga mambabatas na miyembro ng prosecution team kaya nakararanas sila ngayon ng pagkapahiya sa impeachment trial.

Ayon kay Lacson, sa umpisa pa lamang ay katakot-takot na dokumento na agad ang ibinandera ng mga mambabatas sa media kaya masyadong tumaas ang expectations sa kanila ng publiko at kahit silang mga senator-judges.

Bukod sa mga ari-arian umano ni Chief Justice Renato Corona na aabot sa 45, na yun pala ay hindi pa aabot ng 30 at ang sinasabing mahigit 100 mga testigo, na ngayon ay iilan pa lamang naman ang kanilang naihaharap, ang siyang dahilan kung bakit nakikita aniya ang malaking pagkukulang ng prosekusyon.

Sinabi ni Lacson na mas maganda kung naging medyo humble ang prosekusyon at nagpanggap na mahina para nasorpresa hindi lamang ang depensa, kundi maging ang publiko.

"So yan din ang masama pag masyado mong tinaas ang expectation ng publiko at senator judges. May impact yan maski papano. Mas maganda yung medyo humble ka nang kaunti parang you are pretending to be weak," wika ng senador.

Itinulad pa ng senador ang prosekusyon sa sama ng panahon kung saan pagkatapos kumulog ay wala namang kasunod na kidlat.

"Eh ang nangyayari nauuna ang kulog sa kidlat. Alam naman natin pag kumulog wala nang kidlat, tapos na. Yan ang kanilang pitfall most of the time," ayon kay Lacson.