Tutol si Sen. Koko Pimentel na amyendahan pa ang rules of impeachment sa kasagsagan ng impeachment trial kay Chief Justice Renato Corona.

Ito ang tugon ni Pimentel kasunod ng hirit kahapon ni defense lead counsel Serafin Cuevas na dapat amyendahan ang panuntunan ng hukuman dahil lumalabas na hindi patas sa nasasakdal, partikular ang probisyon na ipinagbabawal ang pag-object sa katanungan ng mga senator-judges sa testigo.

Sa panayam ng Bombo Radyo, sinabi ni Pimentel na hindi na kailangan ang pag-amyenda sa panuntunan ng impeachment court lalo't mahaba ang proseso ng pag-amyenda nito dahil maliban sa idaan ito sa debate sa plenaryo ay magkakaroon pa ng publications na maaaring magdulot ng lalong pagkaantala ng paglilitis.

Binigyang diin pa ni Pimentel na kung hindi man pinapayagan ang pagharang ng magkabilang partido sa mga katanungan ng senator-judges ay nabibigyan naman sila ng pagkakataon na magpaliwanag sa objections at nare-record sa korte.