Pinagmumulta ngayon ng Supreme Court (SC) ang isang huwes mula sa Municipal Trial Court (MTC) ng Bayugan, Agusan del Sur dahil sa simple misconduct.

Ito’y matapos umanong idahilan ni Judge Eliseo Campos ang pagiging homosexual niya para mapawalang bisa ang kasal sa asawang si Aida at akusahan pa nito ng pakikipagrelasyon sa ibang lalaki ang kaniyang misis.

Pero nabigo si Campos na patunayan ang mga alegasyon sa kaniyang maybahay.

Base sa rekomendasyon ng Office of the Court Administrator (OCA), guilty sa salang simple misconduct ang huwes at kinakailangan itong patawan ng parusa.

Dahil dito, nagpasya ang Korte Suprema sa pamamagitan ng hatol na isinulat ni Associate Justice Antonio Carpio mula sa SC Second Division na pagmultahin si Campos ng P20,000.

Ang nasabing halaga ay ibabawas sa kaniyang mga benepisyong dapat na matanggap, matapos magbitiw sa tungkulin.