Muling sinugod ng may 150 militante mula sa grupong Anakpawis, Bayan, Gabriela, KMU at mga grupo ng magsasaka sa Hacienda Luisita ang harap ng Supreme Court (SC).

Pasado alas-10:00 ng umaga nang sila ay magmartsa mula sa Plaza Salamanca patungo ng SC sa Padre Faura, Manila.

Hiniling nila ang pagbasura sa motion for reconsideration na inihain ng pamilya Cojuangco at Aquino kaugnay ng desisyon ng korte na ipamahagi ang lupain ng hacienda sa mga magsasaka.

Ayon kay Lana Linaban, secretary general ng Gabriela, dapat na umanong isapinal ng hukuman ang pasya na pamamahagi ng lupa sa mga manggagawang bukid.

Nababahala kasi sila na makagawa pa ng iba't-ibang paraan ang pamilya ni Pangulong Benigno "Noynoy" Aquino III para bawiin ng korte ang nauna nitong desisyon.

Isa ring liham ang kanilang ipinaabot sa kataas-taasang hukuman na naglalaman ng kanilang hiling na ipamahagi ng libre at walang kondisyon ang lupa ng hacienda sa mga benepisyaryong magsasaka.