Maging ang ilang mga senador, congressmen at mga miyembro ng gabinete ay nakakatanggap rin umano ng "free trips" mula sa Philippine Airlines (PAL), katulad ng prebilihiyong natanggap ni Chief Justice Renato Corona.

Sa katunayan, inamin ni former Senate President Ernesto Maceda na noong ito ay mambabatas pa, tumanggap din ito ng trip passes mula sa flag carrier ng bansa.

Una ng inakusahan ng House prosecution panel si Corona na pagtanggap ng mga pabor mula sa PAL, sa kabila ng kontrobersiyal na kasong kinakaharap ng kompaniya.

Pero para kay Maceda, malabo umano ang alegasyon na dahil sa nasabing mga libreng-sakay mula sa PAL ay kaya na ni Corona na impluwensiyahan ang desisyon ng buong kataastaasang hukuman.

Samantala, suportado ni Senator-Judge Miriam-Defensor Santiago ang ruling kahapon ni Presiding Judge Juan Ponce Enrile na huwag tanggapin ang testimoniya ng isang opisyal ng PAL laban kay Chief Justice Renato Corona.

Sa kaniyang manifestation, iginiit ni Santiago na tama lamang ang ginawa ni Enrile sa ilalim ng due process clause ng batas.

Binigyang diin pa ni Santiago na sa kabilang ng mga akusasyon laban sa punong mahistrado, patuloy pa ring pinoprotektahan ng Konstitusyon ang karapatan nito.

Pinayuhan pa ng senadora ang mga bumabatikos sa desisyon ng impeachment court na magbasa at unawain ang batas.